Ar 12 Mehefin 2025, cynhaliodd y Fforwm Rhyngseneddol ei seithfed cyfarfod ers ei sefydlu yn 2022.
Mae'r erthygl Pigion hon yn rhoi gwybodaeth am rôl y Fforwm Rhyngseneddol ac yn crynhoi'r hyn a drafodwyd yn y cyfarfod diweddar.
I gael rhagor o wybodaeth am y Fforwm Rhyngseneddol, gweler ein herthygl gynharach.
Beth yw'r Fforwm Rhyngseneddol?
Mae’r Fforwm Rhyngseneddol yn cynnal cyfarfodydd ddwywaith y flwyddyn, gan ddwyn seneddwyr o bob cwr o’r DU ynghyd i drafod materion trawsbynciol.
Gwnaeth iteriad presennol y Fforwm Rhyngseneddol gyfarfod am y tro cyntaf ym mis Chwefror 2022, yn dilyn ymlaen o'r gwaith a sefydlwyd gan y Fforwm Rhyngseneddol ar Brexit.
Mae blaenoriaethau'r Fforwm yn cynnwys goruchwylio:
- Cysylltiadau rhynglywodraethol, gan gynnwys cytuno ar adroddiad blynyddol ar y cyd ar fynd i'r afael â heriau cyffredin ynghylch gwaith craffu;
- Rhoi cytundebau rhyngwladol ar waith, gan gynnwys y Cytundeb Masnach a Chydweithredu, y Cytundeb Ymadael a Phrotocol Iwerddon/Gogledd Iwerddon;
- Marchnad fewnol y DU gan gynnwys Deddf Marchnad Fewnol y DU a Fframweithiau Cyffredin;
- Effaith y trefniadau cyfansoddiadol newydd ar y broses ddeddfwriaethol gan gynnwys y defnydd o bwerau is-ddeddfwriaeth a'r broses cydsyniad deddfwriaethol.
Y seithfed cyfarfod
Cynhaliwyd y cyfarfod hwn gan Dŷ’r Cyffredin ac fe’i cadeiriwyd gan Simon Hoare AS, Cadeirydd y Pwyllgor Gweinyddiaeth Gyhoeddus a Materion Cyfansoddiadol.
Yn dilyn y cyfarfod, rhyddhaodd y Fforwm Rhyngseneddol ddatganiad ar y cyd yn crynhoi yr hyn a drafodwyd. Roedd hyn yn cynnwys:
- Pryderon mewn perthynas â gweithrediad Deddf Marchnad Fewnol y DU;
- Cyfyngiadau'r system ariannu bresennol ar gyfer y llywodraethau datganoledig;
- Faint o ddeddfwriaeth a gyflwynwyd gan Lywodraeth y DU mewn meysydd datganoledig, yr heriau y mae Seneddau datganoledig yn eu hwynebu o ran craffu'n effeithiol ar femoranda cydsyniad deddfwriaethol a natur anfoddhaol y broses ddeddfwriaethol;
- Pa mor araf yw’r broses sy’n gysylltiedig â chytuno ar Fframweithiau Cyffredin a'r goblygiadau canlyniadol ar gyfer eu gweithredu;
- Anawsterau y mae seneddau datganoledig yn eu hwynebu wrth ymgymryd â gwaith craffu ar gytundebau rhyngwladol;
- Yr her o gynnwys cynrychiolaeth o’r seneddau datganoledig yng Nghynulliad Partneriaeth Seneddol y DU a’r UE;
- Sut mae Llywodraeth y DU wedi trin cysylltiadau rhynglywodraethol ers yr Etholiad Cyffredinol.
Cytunodd y Fforwm Rhyngseneddol i wahodd gweinidogion o’r bedair Llywodraeth i ymddangos gyda'i gilydd yn y Fforwm nesaf.
Trefnwyd y bydd y cyfarfod nesaf yn cael ei gynnal yn yr hydref yn 2025.
Erthygl gan Adam Cooke, Ymchwil y Senedd, Senedd Cymru.
