Cafodd Y Bil Diogelu'r Amgylchedd (Cynhyrchion Plastig Untro) (Cymru) ei osod gerbron y Senedd ar 20 Medi 2022. Yr Aelod sy'n gyfrifol am y Bil yw'r Gweinidog Newid Hinsawdd, Julie James AS.
Mae’r Bil yn ei gwneud yn drosedd i berson gyflenwi neu gynnig cyflenwi (gan gynnwys yn rhad ac am ddim) gynhyrchion plastig untro (SUP) a restrir yn y Bil, sef yr eitemau mwyaf cyffredin o ran cael eu taflu fel sbwriel, i ddefnyddiwr yng Nghymru.
Ymgynghorodd Llywodraeth Cymru ar gynigion i wahardd naw cynnyrch plastig untro rhwng 30 Gorffennaf a 20 Hydref 2020. Cyhoeddwyd y crynodeb o’r ymatebion ym mis Awst 2022.
Mae'r Bil a'r Memorandwm Esboniadol wedi eu cyhoeddi ar wefan y Senedd.
Mae ein Crynodeb o'r Bil yn amlinellu effaith arfaethedig y Bil, ac yn rhoi crynodeb o'i ddarpariaethau. Mae hefyd yn cynnwys safbwyntiau rhanddeiliaid o grynodeb Llywodraeth Cymru o'r ymatebion i'r ymgynghoriad.
Erthygl gan Lorna Scurlock a Chloe Corbyn, Ymchwil y Senedd, Senedd Cymru
