Adran 1
Mae adran 1 yn cyflwyno dwy drosedd newydd sy’n gwahardd:
· gweithredwr stadiwm neu leoliad tebyg yng Nghymru rhag ei ddefnyddio, neu dan wybod iddo rhag caniatáu iddo gael ei ddefnyddio, i rasio milgwn; a
· pherson rhag bod ynghlwm wrth drefnu rasio milgwn yng Nghymru (mae’r Nodiadau Esboniadol yn datgan a yw hyn mewn stadiwm neu leoliad tebyg, neu unrhyw le arall, er enghraifft ar dir agored).
Mae person sy’n euog o’r troseddau hyn yn agored ar euogfarn ddiannod i ddirwy (nad yw’r Bil yn rhoi terfyn uchaf arni).
Adran 2
Mae adran 2 yn diffinio’r termau ‘rasio milgwn’ a ‘gweithredwr’
Adran 3
Mae adran 3 yn cyflwyno Atodlen 1 i’r Bil sy’n gwneud darpariaeth ynghylch troseddau o dan adran 1 a gyflawnir gan gyrff penodol.
Adran 4
Mae adran 4 yn cyflwyno Atodlen 2 i’r Bil sy’n gwneud darpariaeth ynghylch gorfodi’r troseddau o dan adran 1.
Adran 5
Mae adran 5 yn nodi pryd y daw pob darpariaeth yn y Bil i rym. Byddai’r gwaharddiad ar rasio milgwn yn dod i rym dim cynt na 1 Ebrill 2027 a dim hwyrach na 1 Ebrill 2030.
Adran 6
Mae adran 6 yn darparu’r enw byr sef “Deddf Gwahardd Rasio Milgwn (Cymru) 2026”, neu “Prohibition of Greyhound Racing (Wales) Act 2026”.
Paragraff 1
Mae Atodlen 1 yn gwneud darpariaeth ynghylch troseddau o dan adran 1:
Mae paragraff 1 yn nodi y gall unigolion penodol fod yn agored yn droseddol am y drosedd yn adran 1 pan fo’r drosedd yn cael ei chyflawni gan gyrff penodol (corff corfforedig; partneriaeth; neu gymdeithas anghorfforedig ac eithrio partneriaeth). Er enghraifft, gallai cyfarwyddwr cwmni hefyd fod yn agored yn droseddol am drosedd a gyflawnwyd gan y cwmni.
Paragraff 2
Mae paragraff 2 yn nodi sut y dylid dwyn achos yn erbyn partneriaeth neu gymdeithas anghorfforedig yr honnir eu bod wedi cyflawni trosedd o dan adran 1.
Paragraff 1
Mae Atodlen 2 yn gwneud darpariaeth ynghylch pwerau gorfodi:
Mae paragraff 1 yn darparu dehongliad o’r termau ‘arolygydd’ (a benodir gan Weinidogion Cymru neu gan gynghorau sir, neu gynghorau bwrdeistref sirol yng Nghymru, i orfodi’r troseddau yn adran 1), ‘pŵer mynediad’ a ‘mangre’.
Paragraff 2
Mae paragraff 2 yn rhoi pŵer i arolygwyr i fynd i fangreoedd nad ydynt yn anheddau, pan fo rheswm dros amau bod trosedd o dan adran 1 yn cael ei chyflawni, wedi’i chyflawni neu ar fin cael ei chyflawni, neu y gellir dod o hyd I dystiolaeth bod trosedd yn cael ei chyflawni, wedi’i chyflawni neu ar fin cael ei chyflawni.
Paragraff 3
Mae paragraff 3 yn rhoi pŵer i arolygwyr i fynd i anheddau. Dim ond os yw’r meddiannydd neu’r person sy’n gyfrifol am y fangre yn cydsynio, neu os yw’r arolygydd yn cael gwarant gan Ynad Heddwch, y caiff yr arolygydd ddefnyddio’r pŵer hwn.
Paragraff 4
Mae paragraff 4 yn darparu bod gwarant o’r fath yn awdurdodi mynd i’r fangre unwaith yn unig a bod yn rhaid ei defnyddio o fewn 28 o ddiwrnodau o’r dyddiad y’i dyroddwyd.
Paragraff 5 - 8
Mae paragraffau 5, 6, 7 ac 8 yn gwneud darpariaeth bellach ynghylch y pwerau i fynd i fangre. Mae hyn yn cynnwys y caiff arolygydd fynd â phersonau priodol eraill i’r fangre.
Paragraff 9
Mae paragraff 9 yn disgrifio’r pwerau arolygu, chwilio ac ymafael sydd ar gael I arolygydd wrth arfer pŵer mynediad.
Paragraff 10
Mae paragraff 10 yn darparu y caiff person sy’n dod i’r fangre gyda’r arolygydd ddefnyddio pwerau’r arolygydd o dan baragraff 9, ar yr amod ei fod o dan oruchwyliaeth yr arolygydd.
Paragraff 11
Mae paragraff 11 yn gwneud darpariaeth ychwanegol ynghylch y pŵer ymafael.
Paragraff 12
Mae paragraff 12 yn darparu bod person yn cyflawni trosedd os yw’n methu â chydymffurfio â chais arolygydd am gymorth neu’n rhwystro arolygydd yn fwriadol. Gall trosedd o dan y paragraff hwn fod yn destun achos yn Llys yr Ynadon, a gaiff osod dirwy (nad yw’r Bil yn rhoi terfyn arni) os ceir y person yn euog.
Paragraff 13
Mae paragraff 13 yn amddiffyn arolygwyr a phobl y mae arolygwyr yn mynd â nhw i fangre rhag atebolrwydd sifil neu droseddol am unrhyw beth a wneir o ganlyniad i gyflawni eu dyletswyddau. Rhaid i’r llys fod yn fodlon bod y weithred wedi’i chyflawni yn ddidwyll a bod sail resymol dros ei chyflawni.
